哈羅醜聞多籮籮 貪曾關照又惹禍

講真，呢間學費超高、設施超豪嘅新進「貴族名校」，從籌備到開學是非不斷，貴氣就冇嘞，腐氣就唔少。呢嗱，話口未完又捲入懷疑利益輸送醜聞嘞。該校被指喺一一到一三年間，向同名私人公司哈羅國際管理服務有限公司支付超過三千萬元費用。咁啱得咁蹺，哈羅學校多名校董同時又係哈羅管理嘅董事，可以透過呢間公司獲得酬金，話當中冇蠱惑喎，三歲細路都唔信喇。

即係咁，雖然根據教育局規定，非牟利學校嘅校董係唔可以用任何形式取得學校收入嘅，但哈羅管理屬可以收取分紅嘅私人公司，變相容許學校創辦人邱達強同另外四位董事收取學校分紅。簡單啲講，即係有人玩花招，左手唔可以攞錢咯喎，咪用右手攞囉，仲話乜嘢非牟利機構喎，呃鬼咩。

嗱，有立法會議員就講得啱嘞，市民對事件係咪涉及利益輸送有質疑，校方同教育局一定要公開交代。可惜吖，教育局嘅答覆模棱兩可，話暫時未收到相關投訴，局方正按現有機制向哈羅作出跟進喎，講咗等於冇講。

市民同議員有質疑一啲唔出奇，事關呢間貴族學校一直被指搵納稅人着數，係官商勾結、損公肥私嘅產物。當年貪曾揚言發展「六大優勢產業」，仲將教育產業列為六大之首，以為佢有乜高招施展宏圖大計啦，原來係慷納稅人之慨，竟然將市值十四億元嘅黃金地皮，以一千元象徵性代價，批咗使用權畀哈羅做校舍。咁都唔止，貪曾仲「賣大包」提供免息貸款，並親自主持奠基儀式添。

係人都知，貪曾份人一向縮骨兼貪得無厭，無寶不落，大到深圳禮賓府小到菜心葵花雞，一樣照貪可也，佢瞓身支持貴族學校，如果話係大公無私，講都冇人信喇。所以咯喎，當局唔單止要將哈羅管理層涉嫌利益輸送嘅嫌疑查個水落石出，更加要順藤摸瓜，查吓哈羅同貪曾之間有乜轇轕，畀公眾一個明確交代。

話時話，貪曾案案發至今已經三年，廉署查咗咁耐仲係得個吉，計太一叮話齋，如果從哈囉呢單醜聞入手，話唔定拔出蘿蔔帶出泥，隨時發現重大線索o架，叮！