政壇：蔡堅史泰祖尷尬「破冰」
佔領行動搞到社會撕裂，醫學界都唔例外，香港醫學會會長史泰祖同前會長蔡堅早前就因為搞佔中立場民調鬧不和，蔡堅曾揚言如果有人搞到醫學會「亂晒大龍」，佢隨時可以出番嚟選會長喎。過去一段時間，蔡堅一直「黑面」唔多理睬史泰祖，但尋日醫學會舉行傳媒午宴，佢哋竟然握手兼合照，實在難以置信，究竟發生乜事呢？
謝鴻興（右一）充當和事老，促成蔡堅（左二）勉強同史泰祖（右二）握手。周伯展（左一）肉緊捉實蔡堅隻手，想甩手都好難。
促成今次「破冰」握手嘅，多得前會長謝鴻興充當和事老。謝醫生甫到會場，即講笑話和諧先好，隨即拉住史泰祖走到蔡堅身邊，捉住兩人隻手握埋一齊。醫學會副會長周伯展亦「幫手」，搞到蔡堅好似被人挾持住咁。此情此景，蔡醫生勉強唧出少少笑容，場面尷尬。史泰祖大讚謝鴻興識做，話「抵請你食飯」！
蔡堅提到近期動向，話有人正成立基金會，向佔領行動人士提供法律或醫療援助，佢會以個人身份幫手審批基金申請，強調自己係政治中立。
