郭榮鏗（中）尋日同單車及私家車鬥快去到金鐘，證實港島區跑步快過搭車。（受訪者提供）
咪睇立法會法律界議員Dennis郭榮鏗官仔骨骨，有啲柔弱咁，但原來佢不時都會跑步鍛煉身體，尋日朝早仲參加由環保團體「健康空氣行動」舉辦嘅小型實驗比賽，用雙腳同單車及私家車鬥快由跑馬地司徒拔道去皇后大道東終點，全程三公里，發現原來跑步快過搭車。Dennis話如果大家肯行多兩步，減少開車，就可以大大減低由汽車引致嘅污染問題。
家住跑馬地嘅Dennis話平日只要有時間，都會由屋企跑落銅鑼灣，又話跑步除咗可以強身健體，仲有減壓嘅作用。佢話喺比賽期間，雖然同單車選手都要孭住一個量度微細懸浮粒子（PM2.5）嘅監測器，測試灣仔一帶嘅空氣污染水平，但跑起來仍然好輕鬆，唔覺得附近空氣質素特別差。
單車選手用咗八分十五秒就到達終點，而Dennis就用咗十九分十八秒，反而私家車最慢，要四十分二十五秒才到達終點。不過，又唔可以話私家車好慢，事關灣仔返工時間非常擠塞，加上私家車選手要先喺停車場泊好架車先再行去終點，所以遲咗一大截。
第一手消息請下載on.cc東網
