延誤超支知多少 最怕大橋通不了

即係咁，港珠澳大橋香港口岸工程追加撥款申請，日前終於獲立法會交通事務委員會開放綠燈，涉及五十四億元，令成個工程核准預算增加到接近三百六十億元，比原來估算高出四成，都咪話唔得人驚。其實，工程超支早就預咗嘅喇，今次追加撥款能夠通過，總算係有驚無險，如果再阻一阻，超支可能仲多添吖。

係呢，超支還超支，大橋究竟幾時可以通車吖？運輸及房屋局局長張炳良係咁講嘅，根據粵港澳三地各自評估，整個大橋項目如期明年底同步建成困難好大，確實通車日期有待進一步評估，佢承認香港口岸工程同香港接線工程「遇到唔少挑戰」，未必趕及一六年底完工。不過咁，佢死撐話大橋通車日期未定唔關港方工程進度太慢喎。

嗱，呢啲咪叫不打自招囉。無良政客鼓動東涌居民提出司法覆核，港珠澳大橋香港口岸工程動工已經遲過人哋，加上工程展開後，又發現施工比預期困難，令進度進一步滯後，咁唔係港方工程進度太慢又係乜吖。

係人都知，今時今日香港政治爭拗不斷，港府做任何嘢都有人反對及阻撓，咁嘅政治環境下，港珠澳大橋成本只會繼續超支，通車日期只會不斷延誤嘅咋。家陣珠海同澳門兩地工程進展順利，如期通車毫無懸念，淨係香港段問題多多，一拖再拖，萬一到時無法合龍咯喎，唔止丟架，直頭累人累物添喇。

講開又講，本港大型基建因政治干擾，政客玩嘢，導致延誤及超支，又點止港珠澳大橋吖。高鐵工程、港鐵沙中線、南港島線等等，無一幸免。最離譜係西九文化區，家陣十畫仲未有一撇，但成本就不斷上漲，原先預計只需二百幾億元，舊年估計需要五百億元，足足增加一倍有多，最後埋單計數可能遠遠唔止呢條數添吖，成為名副其實嘅大白象工程。你話嘞，納稅人係咪好無辜吖？

冇法子喇，政府無能，政客無良，大型基建有乜法子唔搞到一鑊泡吖。再咁落去，香港就算有金山銀山，遲早坐吃山空嘅咋，呢啲咪叫自作孽，不可活囉，叮！