一年容易又除夕，二○一四年即將成為歷史嘞。其實，今年香港紛紛擾擾，風雨飄搖，一啲都唔易過o架，不過無論點都好喇，新年新氣象，今晚維港有煙火匯演，港九多處都有倒數活動，大家不妨暫時拋開煩惱，平平安安、開開心心迎接新一年。
講起倒數活動，真係好事多磨，佔領行動死唔斷氣，一時「鳩嗚」，一時「Ｖ煞」，一時「報佳音」，搞到尖沙咀平安夜倒數活動都要被迫取消，幾冇癮呀。好彩今晚嘅煙火及倒數活動如期舉行，風雨不改。警方亦表明會嚴陣以待，果斷執法咁話。
難怪警方咁緊張嘅，事關佔領鬧劇表面結束，其實禍根未除，隨時死灰復燃o架。大家有眼見，立法會添美道一帶，近日嘅帳篷數目突然激增，由最初五十個，變成家陣超過一百二十個，包括唔少大型帳篷，每日起碼有幾十人留守，搞到成個「村落」咁。仲有吖，現場設施愈來愈有規模，物資站、充電站、頭盔陣甚至連晾衫架都有。畫公仔畫到出腸喇，如果唔係有人死心不息，計劃捲土重來，使乜喺度整色整水吖！
正所謂，斬草唔除根，妖風吹又生。正如立法會議員話齋，當局清場畏首畏尾，「留低火種」，搞到佔領人士愈來愈肆無忌憚，加上警方執法唔夠徹底，佔領人士好似同警方玩貓捉老鼠咁，反反覆覆，驅之不散，問你點頂。
冇錯嘞，幕後黑手仲未達到政治目的，又點會咁易收手吖，淨係睇吓各區陸續出現黃色直幡就知喇。佔領搞手威脅話喎，如果港府唔推行佢哋要求嘅真普選，唔止會再次發動佔領，直情會出現暴動添；有外國傳媒甚至警告香港明年可能宣布進入緊急狀態，解放軍進駐市區，問你怕未。
冇計喇，港府欺善怕惡，明明將牛鬼蛇神一網成擒，點知轉頭又放虎歸山，佢哋唔囂張至奇喇。所以話啫，打蛇打七寸，擒賊先擒王，港府一日唔將牛鬼蛇神繩之以法，香港想有好日子過都幾難。
其實，一切事在人為嘅啫，警方完全有能力執法，好似解款車跌錢事件咁吖，警方火速拘捕多名拾遺不報人士，反而對佔領鬧劇投鼠忌器，甚至輕輕放過幕後黑手，你話係咪奇怪吖？咪話太一叮唔提醒，反對派堅持要「玩鋪勁」，當局繼續綁手綁腳，遲早畀人玩番轉頭嘅咋，叮！
第一手消息請下載on.cc東網
