政壇：切燒豬手勢好梁卓偉入錯科？

曾任食物及衞生局副局長嘅港大醫學院院長梁卓偉（Gabriel），本身係公共衞生專家，照計唔使學揸手術刀。尋日佢出席一個診所開幕儀式時，與一眾嘉賓齊齊切燒豬，結果佢一刀切到尾，手勢好到極，當場被笑指佢入錯科，當年應該修讀外科喎！

港大肝膽胰外科前主任潘冬平同細佬嘅診所尋日開幕，好多醫學界名人都去撐場，食衞局副局長陳肇始亦有出席，出現咗食衞局前後任副局長難得同場嘅畫面，場面相當熱鬧。

既然係開幕儀式，又點少得切燒豬，識彈奏好多樂器、又做樂團指揮嘅Gabriel手臂特別有力，見佢切燒豬時由頭切到落尾，表現好出色，即刻被潘冬平發現佢嘅新專長，笑稱佢應該做外科醫生。不過若畀Gabriel再揀過，可能佢會選擇做音樂家都未定。