政壇：搞搞政：公務員加薪拉布 泛民玩殘自己友
立法會忙拉布，公務員加薪撥款案拖咗近九個月，日前啱啱闖關成功，十幾萬公務員總算趕得及喺過年前出新糧，仲有望一次過逗幾個月「欠薪」當花紅，不過，一班無得追溯加人工嘅政府資助機構員工，尤其是津校老師同社工，就得個恨字。話時話，呢兩大界別係泛民嘅大票倉，泛民拉布，原來最被玩殘嘅係自己友，唔知立法會教育界議員葉建源同社福界張國柱會唔會踩蕉皮呢？
設計圖片及對白
傷害票源 自掘墳墓
公務員事務局局長鄧國威講到明，公務員可以喺月尾出「新糧」，但資助機構員工未必可以，現階段需時核實資料，會促請資助機構盡快向員工出新糧。資助機構中有好多津校老師同社工，向來係泛民鐵票，早前唔少老師擔心無人工加，出聲敦促立法會盡快通過加薪議案，現時政府講明，有機會延遲資助機構員工加薪，佢哋肯定有嘢講噃。
泛民發起拉布，搞成咁嘅局面，資助機構員工要怨都知搵邊個。泛民以為拉布可以玩殘政府，點知玩殘自己。
