政壇：英美唔幫拖 泛民腳震
香港政改搞到一鑊粥，各方熱烈爭拗嘅一點，係外部勢力干預。英國外交及聯邦事務部國務大臣施維爾早幾日低調到港，私下約見泛民議員傾政改，之後又返回英國，喺英國會交代詳情時表示，香港民主「有總好過沒有」，仲明撐泛民應該「袋住先」，佢嘅發言對本地泛民真係冷水兜頭淋，公文袋嘅梁家傑即刻鬧英國冇盡道義責任，白鴿黨何俊仁（AV仁）更肉酸，佢早前宣布要辭職引發公投時，話到明唔會袋住先，家吓英國傳來新指示，點算好？腳震震喇！
設計圖片及對白
施維爾話，即使香港嘅政改框架唔完美，都支持泛民通過政改。英國已經轉軚，有迹象顯示泛民最大「靠山」嘅美國亦開始唔幫拖，有人更指，美國駐港總領事夏千福近排大減活躍度，某種程度上亦反映美國對港政策開始轉向。
AV仁辭職 騎虎難下
據指，夏千福到港履任之初，曝光率超高，無論落區去茶餐廳歎茶，定係去戲院睇首映，都會擺相上社交網站，又不時開口論政，一度惹起中方不滿。但去年年尾佔領行動發生之時，據聞夏千福就被美國「雪藏」，自此之後，大家有冇見到佢高調出席公開場合呀﹖更加唔好話高調發表言論喇。我哋翻查過佢嘅社交網站，果然夏千福真係潛晒水，對上一次公開露面已經係去年十月嘅事，泛民想搵山姆大叔撐，真係要敲開雪櫃度門至得。
英國喺呢個時候轉口氣，對一眾泛民議員真係好大打擊，事關連英國佬都認為泛民應該袋住先，本地民意肯定會繼續蒸發，並促使「袋住先」支持陣營進一步擴大。可惜嘅係，一眾泛民先簽咗意向書，後又綑綁杯葛次階段諮詢，AV仁更搶閘表態，要否決政改方案，然後辭職引發公投，可謂勢成騎虎、做硬普選殺手，唔想咁，轉軚太肉酸，唔轉肯定成為歷史大罪人，呢次真係未玩到人，先玩死自己。
