水池淪為垃圾崗 房署官僚嘥公帑

嗱，講緊嘅咪就係房屋署囉。喺該署嘅網頁及刊物中，關於公共屋邨嘅介紹，經常可以見到「小橋流水」，美輪美奐，詩情畫意，其實，呢啲不過係假象咋，全港一百六十幾條公共屋邨中，本來設有二十個水池，可惜唔少已經人間蒸發，有啲甚至變成垃圾崗，小橋流水只待成追憶咯。

好似大圍美林邨咁吖，原本有半個籃球場咁大嘅水池，但已經荒廢多年，近年甚至被填平，仲豎起一米半高嘅鐵圍欄添。據講，署方本來諗住將水池改為其他康樂設施，點知研究來研究去都冇結果。正如區議員質疑，房署嘅辦事效率好有問題囉。

話時話，就算水池成功改變用途，都未必可以令居民受惠喇。例如筲箕灣耀東邨嘅水池，原本設計成小橋流水，幾浪漫o架，後來房署話有蚊患要關閉，最後索性用石屎封埋，整咗石地同花圃，完全冇實際用途；又例如觀塘樂華北邨，一個多層流水式水池被房署填平，話就話改為花圃，但就充斥垃圾，唔止大殺風景，而且比水池更加惹蚊。

風水學話，山管人丁，水管財祿。公共屋邨加設水池，象徵風生水起，本來意頭十足，房署係都要填平佢哋，令人莫名其妙。就算唔講風水，學似建築專家話齋，公共空間加設水池裝飾可以令環境更有動態，為居民帶來視覺同聽覺享受，咁又有咩唔好呢？人哋斬腳趾避沙蟲，房署就填水池避蚊患，你話幾戇居吖。不可不知，有流水設備同燈飾嘅水池，造價閒閒哋兩、三百萬元，房署呢頭起，嗰頭填，簡直係倒錢落海，多多公帑都唔夠佢哋浪費喇。

講到浪費公帑，又點止咁多吖，房屋署係咁，康文署亦係咁。好似耗資超過十一億元興建嘅將軍澳單車館，話就話係世界級比賽場地，點知舊年四月底至開張，十一月就因為賽道不平而要封館三個月做「優化工程」，大拿拿四百二十萬元工程費同三十幾萬元場租損失，統統由納稅人埋單。

所以話，港產官僚大事做唔到，小事做唔好，連公屋水池都搞到一鑊泡，真係唔到你唔服。咪話太一叮唔提醒吖，港產官僚洗腳唔抹腳，當局再唔盡快「執漏」，庫房遲早乾塘嘅咋，叮！