城中鏡：有發現：波波難忘極地樂事
極地博物館基金日前喺理工大學舉辦《極地30情獻》籌款晚會，為推動未來極地科研工作同建立極地資料庫籌募資金，讓無機會去嘅人都可以深入認識極地氣候及環境變化嘅最新情況。晚會獲唔少去過極地嘅城中名人到場支持，仲分享到極地探索嘅趣事。
李樂詩（中）獲城市大學校董會主席胡曉明（左）同陳茂波（右）捧場支持。
魏華星（左起）、楊大偉、楊素珊同王利民齊齊支持極地博物館籌款。
岑智明原本打算下月勇闖南極，可惜同工作會議撞期。
基金創辦人李樂詩開玩笑話，要趁自己失憶之前，盡量記錄多一啲喺極地考察嘅成果。
坐「坦克車」掃貨
身旁嘅發展局局長「波波」陳茂波就話，佢同李樂詩相識二十幾年，九三年仲一齊組團，一行十幾人喺南極度過白色聖誕。佢話最難忘當年長城站職員用類似坦克車嘅雪地車接載佢哋，途經俄羅斯考察站時眾人仲化身購物團齊掃襟章同小飾物，回程時就喺阿馬遜森林過咗個暖笠笠新年。
有捧場嘅仲有社企Green Monday創辦人魏華星同David楊大偉、康宏集團主席Quincy王利民、香港專業及資深行政人員協會理事楊素珊。曾經同魏華星一齊參加過北極馬拉松嘅Quincy透露，兩星期後將出發智利同南極跑馬拉松，進一步挑戰自我。David就笑言飲食先係佢強項，佢話五月米蘭嘅世博主題同食物環保有關，開正佢個範疇，適逢四月底又係佢哋社企成立三周年，到時會去當地參觀順便慶祝。
想去極地嘅仲有仁濟醫院主席蘇陳偉香，佢話之前去九寨溝時試過高山症發作，自知體能未必應付到極地，就費事冒險喇。天文台台長岑智明本來下月都想去南極，可惜同工作會議撞期，惟有等下年再去喎。
