房屋署日前被揭發棄用多個公共屋邨嘅水池，枉嘥數以百萬計公帑。有調查發現唔少公共屋邨原本設有小橋流水，原意用以提升市民嘅生活質素，點知原來唔少水池近年都已人間蒸發，而且荒廢至今，居然冇改做其他康樂設施，就算有啲被改建做花圃都清理乏力，分分鐘變垃圾崗，反而損害居民嘅生活質素。公帑就識使，嘢就白做，身兼房屋署署長嘅運房局常秘應耀康孭晒鑊，仲唔快啲諗橋撥亂反正嘅話，只會激起更大嘅民憤，到時想救火都難。
