政壇：證監女揸弗人排隊退休
尋日滙豐香港「一姐」馮婉眉突然喺下月中離任消息，震撼銀行界，查實近排本港財金界女揸弗人陸續排隊退休，繼財經事務及庫務局前常任秘書長區璟智喺啱啱過去嘅平安夜離任後，另外一名財金界女話事人、證監會副行政總裁張灼華亦將會喺今年二月底退休。
張灼華主催中港基金互認，唔知可唔可以喺佢退休前出世呢？（資料圖片）
張灼華喺證監會屬「老臣子」，已工作多年。佢九八年加入證監會，○一年起獲委為執行董事，○八年更獲升為副行政總裁。舊年佢同政府續約時，有別於以往續約三年，只續約一年，任期至下月二十八日屆滿。證監會舊年六月已開始公開招聘投資產品部執行董事一職，當時市場已揣測張灼華今年二月任期屆滿時會退休。
大家都知，中港基金互認一直係張灼華主催，差唔多可以用佢個「baby」嚟形容，依家距離退休只有一個多月，呢個baby可唔可以喺佢退休前出到世，要有水晶球先知。
