外圍市況表現起起落落，港股就繼續維持在幾百點波幅內上落，論市況真係冇咩微言大義。事實上，現水平指數相關產品揸沽都係咁上下，水位唔多，站在炒家角度，個市升唔起，就寧願佢一下跌番千零點，咁反而仲有得博！

聯想藉手機、板腦和PC產品協同效應，在內地市場具競爭優勢。（資料圖片）

A股未來一個月有多隻IPO招股，市場承接力備受考驗，尋日滬綜指跌逾2%收場，據講正係因為多咗投資者沽貨套現認購新股。不過，睇唔好後市就唔會走去認購新股。所以話，A股短期調整唔係咩咁大不了，唔使自亂陣腳！

新天綠色炒上落

論板塊，尋日應該是新能源股表現最突出，事關有多個利好消息刺激。其一係有內地傳媒報道，被視為「十三五」可再生能源行業發展指導性文件的新一份可再生能源配額制最近已上報國務院，另一個消息係陸上風電上網電價下調幅度較預期為少，大行又紛紛叫好，反正市場冇咩炒作焦點，就咁順勢起哄，普遍有半成升幅。上月才增持母公司風電項目權益的新天綠色能源（00956），股價亦升5%收市，報1.89元。

新天綠色主要從事天然氣及風電兩大業務，去年上半年純利同比跌43%至1.86億元人仔，主要是工業用燃氣需求下降及風電產量減少。不過，其股價由去年初高位3.86元，跌足成年去到上月低位見1.55元，大概已全面反映了估值下調的影響，過去三個月都見到有幾個基金在低位增持。本月以來股價開始呈圓底回升，尋日更企穩50日線樓上收市。隨着風電行業景氣漸趨明朗，板塊氣氛有改善，股價反彈勢頭可持續，短線料可在1.8至2.2元水平上落。

滙控（00005）係「昔日」散戶愛股，但呢幾年寶座已被中資銀行股取代。不過，大笨象前日跌到落70.45元，較九月中旬高位已累跌近16%，如果唔係有咩「新傷」，照計呢轉調整幅度已足，反彈較大阻力在75元水平。

呢幾日除咗隻騰訊（00700）強勢之外，聯想（00992）亦回勇，尋日再升逾4%。事緣公司即將在內地重推摩記手機，看來過去一年其中一項大型收購的協同效益將會展現。雖然今年內地智能手機市場將會進入鬥到爛的境地，但聯想喺內地都係數一數二，加埋係推中高端手機，又有板腦同PC等多元化產品，唔能夠同其他單純做中低端手機或低毛利手機零件製造股相提並論。加上母公司今、明兩年將會整體上市，故聯想繼續會係基金焦點，10元邊可分注作中長線收集。