Fundman睇市：國美現價博得過

主要反映美國私人企業招聘情況的ADP就業數據，十二月新增職位24.1萬，稍高過預期的22.5萬及前月的22.7萬。今晚輪到官方就業數據出籠，分析員估十二月失業率會輕微改善，由5.8%落到5.7%，非農職位增加24.5萬。今晚只要數字出嚟唔大幅偏離，相信華爾街股市延續反彈的機會仲係高些少。

中移（00941）、騰訊控股（00700）及友邦（01299）接內銀股棒，將大市推返上去接近兩萬四心理關口，恒指尋日埋單升154點，收報23,835點，主板成交1,019億元。

尋日焦點一定係渣打集團（02888）突然公布結束全球現貨股票業務，年底前將裁減二千個職位的消息，由於大刀闊斧慳皮，刺激其股價升3.2元，收115元。過去幾年，渣打都想力谷投行生意，四圍在一線歐美投資銀行高薪挖角，畀外界大手筆的印象。勢估唔到最終係形勢比人強，在今日投資銀行世界強者愈強，其他零售銀行想染指機構客戶不得其門而入之下，最後要散檔收場。

投行生意唔易做

查實投行生意真係唔係想像中咁好做，若非善忘，可能仲記得早三幾年前，南韓第一大企業三星，都嚟過香港想染指投資銀行生意，一樣係由各大行挖角，最後亦因生意平淡而結業收場。

睇落條大數，咪以為舊年港股成交比前年多近一成一，外資行賓架朋友話，舊年十間投行有七間埋單條P&L大數仲衰過一三年，皆因唔少在本地搵食之對沖基金，舊年表現都係一鑊粥，去到下半年怕客仔要贖回，索性少做少錯，投行股票經紀生意麻麻，只有打程式及高頻交易客戶主意。不過，佣金收費唔同一級關係，根本得個做字，如果大市仲喺兩萬、兩萬四浮浮沉沉，今年又無乜大IPO，渣打的退出，恐怕唔會係個別事件咁話。

風電股估值唔平

內地風電上網電價調整幅度低過市場估計，造就一眾風電股包括龍源電力（00916）、華能新能源（00958）及華電福新（00816）等尋日爆升，連設備股金風科技（02208）都升得好誇張吓。而連續炒咗幾日的核電股，中核工業（00611）及中廣核美亞（01811）都升得唔錯，唯獨中廣核電（01816），幾乎隊番晒即市升幅收市，但總結上述幾隻股票，除中廣核電外，大部分都相當超買兼且唔平，睇落唔多值博。

比較奇怪係國際油價連50美元都穿埋，汽車股表現卻相當個別，華晨（01114）挾足三日，反而正路的東風（00489）仲未點行，連吉汽（00175）都作勢補番盈警後在2.79至3.07元的下跌裂口，看來落後的車股可以留意吓，第四季麻麻的銷售數據已經反映晒，短期應該贏面大，輸面細。

近期留意住隻國美電器（00493），早排入股徽商銀行（03698），話拓展金融服務領域，轉頭又擴大小件物流業務，在京滬廣建立智能化零售配送，看來公司經過幾年整合線上線下生意的工作，已經做得八八九九，有時間搞搞周邊配套，包括網購金融平台。但國美有實體店同庫存，營運模式同京東、天貓好唔同，搞埋物流會唔會野心大咗少少？最後又會唔會成功？真係唔識睇。

純以國美現有業務看，一五年11倍PE左右唔貴，趕潮流，追住高估值的金融平台同網購概念故事，睇落有機吸引到一批貪佢夠平的芬佬落疊。睇番股價舊年九月由1.47元高位碌到落1.03元，依家彈番一半左右，似乎又係一隻輸面有限，可博一博的二三線股。