香港依家可以話無平樓，公、居、夾屋樓價輪流創新高。啱啱就出現咗個夾屋王，鴨脷洲悅海華庭2座有個高層單位以518萬元賣咗，計落實用呎價去到12,275元，呎價創咗夾屋市場新高。而唔少二手公屋依家做價已經去到300萬元（股市術語：3球）或以上，單係舊年就有30宗同類登記，比對二○一三年只係得4宗，勁升6.5倍，而全年計落，市場就有619宗二手公屋登記，總值11.86億元，量、值創十五年有紀錄新高。

本港樓價續升，不少二手公屋的做價已達三百萬元或以上。（資料圖片）

十大最高成交價二手公屋登記

悅海華庭近幾個月呎價不斷破頂，舊年年底錄得呎價逾1.2萬元成交之後，啱啱紀錄又被打破。

悅海夾屋王實呎萬二

中原吳敬彰同劉Sir講，悅海華庭2座高層E室，實用面積422方呎，兩房間隔，以約518萬元賣出，實用呎價約12,275元，呎價創咗夾屋市場新高。據了解，原業主喺九八年以約171.2萬元買入上址。

二手公屋舊年表現都相當突出，中原黃良昇話，舊年二手公屋買賣合約登記有619宗，總值11.86億元，創咗有記錄以嚟嘅十五年歷史新高紀錄，相比二○一三年嘅481宗同8.42億元，分別升咗28.7%及40.9%。

黃氏相信係本港樓市買賣氣氛暢旺，經濟向好，市民嘅買樓意欲同能力都高咗，所以刺激公屋交投活躍。

至於公屋嘅樓價都跟隨大市狂升，舊年有30宗價值300萬元或以上嘅二手公屋買賣登記，比二○一三年嘅4宗，明顯增多6.5倍。

鳳德400萬僅次華貴

而歷年十大高價公屋成交榜之中，有9宗喺舊年錄得，最高價係黃大仙鳳德邨紫鳳樓高層單位，成交價400萬元，係歷年次高，而深水埗李鄭屋邨禮讓樓高層單位，成交價錄370萬元，成為歷年第三高。

至於香港仔華貴邨華禮樓中層6室喺二○一三年錄到嘅420全港最高價紀錄，就到依家都尚未能打破。

若果以屋邨計，舊年黃大仙鳳德邨以37宗買賣登記稱冠，跟住就係青衣長安邨，錄到35宗，而黃大仙竹園北邨就有31宗，排名第三位。