奶粉廣告中嘅嬰兒個個精靈活潑，無憂無慮，但長大後又點呢？如果為佢哋拍「續集」，三十年後嘅主角可能就冇咁快樂咯。
嗱，唔係杞人憂天o架。香港人口日趨老化，每個勞動人口要供養愈來愈多長者，有咩法子快樂吖。根據港府嘅《人口政策策略與措施》報告，到咗二○四一年，長者比例將由依家嘅一成半增至超過三成，即係話每三個人就有一個長者；勞動人口參與率將會比依家減少十個百分點，由四點七名勞動人口撫養一名長者，變成一點八名勞動人口撫養一名長者，問你怕未。政務司司長林鄭月娥警告，到時香港經濟增長必定會被拖慢喎。
其實，人口老化問題迫在眉睫，唔使等二十幾年，有學者預測三年後就要面對人口老化帶來嘅種種問題。係人都知，人口老化牽一髮動全身，除咗削弱整體競爭力，拖慢經濟增長，安老、醫療、福利等問題亦會陸續浮現，甚至不斷惡化。有人就講得啱嘞，有啲事「今日唔做，聽日就做唔到」，當局繼續望天打卦等運到，後果真係不堪設想。
既然危機殺到埋身，港府又點應對呢？嗱，施政報告對人口政策着墨唔少，提出包括優化輸入人才政策、吸引港人移民後代回流、延遲公務員退休年齡，以至鼓勵生育等等。話時話，前朝貪曾政府漠視人口老化問題，搞到尾大不掉，積重難返，現屆港府肯正視問題，總算係一種進步，但實際成效係點，仲要睇過至知。
好似吸引移民後代回流咁吖，林鄭吹到天花龍鳳，話自己曾經喺英國生活十八個月，唔少香港移民第二代同佢講，希望回流返港，一來可以照顧祖父母，二來可以把握內地經濟急速增長嘅機遇喎。
聽落似層層，睇真啲原來又係大隻講。林鄭係就係同移民後代接觸過，不過已經係十年前嘅事囉。正如學者話齋，今時唔同往日，如果移民後代睇好中國經濟，可以直接返內地發展，唔使再經香港，官員用十年前嘅經驗套用喺今日係超現實，思維守舊。
冇錯嘞，港府以舊思維處理新問題，又點可能唔撞板吖。始終都係嗰句，要解決人口老化問題，港府一定要與時並進，除咗要創造吸引人才嘅條件，仲要解決住屋同經濟結構單調等深層次矛盾，否則，一味吹水唔抹嘴，講得幾好聽都係假嘅，叮！
第一手消息請下載on.cc東網
