又一山人（左）及施家殷齊撐社企餐廳。
扶康會近日喺香港歷史博物館內開咗間社企餐廳「香城茶室」，為十位殘疾人士提供就業機會。前日餐廳開幕，一班名人齊齊捧場，著名設計師黃炳培（又一山人）話，舖內嘅一枱一櫈甚至地板，都係參考咗三間本地經典冰室嘅設計，大家不妨去考吓自己眼力，同欣賞佢悉心挑選、喺餐廳長期播放嘅粵語長片。
李美嫦（左起）、葉恩明、許曉暉及扶康會康融服務主席李百灝齊歎茶餐廳美食。
康樂及文化事務署署長李美嫦呢日試食顯得滋味，佢話，童年時代唔係經常可以出街食飯，所以大個之後就特別鍾意感受茶餐廳風味，佢最愛絲襪奶茶，仲鍾意走甜。同場仲有名廚周中及扶康會義務司庫施家殷（Kyran），周中話近年食得清淡，而Kyran亦覺得愈好食嘅嘢偏偏愈唔健康，好似無糖汽水總比原味失色，可能係唔少人心聲，惟有勤做運動。
民政事務局副局長許曉暉亦有捧場，聽到扶康會會長葉恩明話未來考慮喺唔同主題展覽提供唔同地方食品，食素嘅佢就話想試下客家小食，覺得茶粿、梅菜蒸豆腐或茄子都應該幾吸引。
第一手消息請下載on.cc東網
