設計圖片及對白
政圈呢排忙個不停，政改次輪諮詢同施政報告接連推出，政黨同議員應該好忙碌，但立法會議員鍾樹根卻有另一大計，佢嘅議辦同民建聯東區支部搞緊個情人節盛事，以浪漫獎品為誘，邀請市民諗計，點樣用三百元同情人喺下月度過最甜蜜、最難忘嘅情人節，風頭火勢下，樹根仲搞埋晒埕埕塔塔嘅事，會唔會畀選民質疑佢不務正業o架？
目標三百元過節
樹根身兼立法會同區議會「雙料議員」，月入逾十萬元，即使要氹老婆，呢一招都唔高明噃，我哋問番樹根，佢解釋，同太太日日都係情人節，唔使搵人借橋囉。至於今次搞比賽，其實係該黨嘅活動噱頭，話對比傳統嘅蛇齋餅糉，呢類比賽容易啲同年輕人拉近距離喎，而且有好橋，又可以推介畀大家參考！咁又係，如果畀樹根太太知道佢打算用三百元慶祝情人節，睇怕扭甩耳仔都似，以後咪諗有靚湯水喇。
講番呢個比賽，佢哋喺社交網站宣布，正舉辦一個「星級情人節方案比賽」，向市民徵集以三百元同伴侶度過情人節嘅方案，再由佢嘅辦事處職員選出最後三強，得獎者可獲酒店雙人自助餐券。
呢個活動食正情人節、網上比賽嘅年輕元素，獎品又係自助餐，真係對年輕人有啲吸引力嘅。話時話，樹根所屬嘅民建聯對比其他政黨，互聯網影響力真係差幾皮，唔少都淪為黨友工作「打卡」之用，據知建仔為咗改變「老餅」形象，只好努力諗計同年輕人拉近距離，據知其中一個「參考」或抄橋對象就係新民黨，呢個情人節方案比賽可能就係其中一個洗底之作，不過，搵樹根呢個結咗婚咁耐、形象又唔年輕嘅人嚟孭飛，會唔會有反效果呢？
第一手消息請下載on.cc東網
