三羊開泰迎新春，是日年初一，先祝各位讀者羊年龍馬精神！萬事勝意！心想事成！
新年好意頭說話最普遍最啱聽嘅，莫過於祝賀身壯力健，原因好簡單，健康係快樂之本吖嘛。家陣愈來愈多市民注重做運動，保持健康，特別係過年過節，家人團年，親友聚會，往往呢個飯局未完，又赴嗰個飯局，隨時食多得滯。消委會都話喇，市面應節食品部分屬高脂、高糖兼高熱量，有啲黑糖年糕食一件等同攝取十粒方糖，已經達到世界衞生組織每日建議攝取量，都咪話唔嚇人。食食埋埋咁多「三高」食品，體重超標事小，影響健康事大吖！
所以話啫，樂極生悲唔一定係搞出大件事，節日攝入高熱量少消耗，都咪話唔煩惱。嗱，唔想周身豬腩肉唔係冇辦法嘅，除咗戒口，仲要多運動消脂，多光顧康體設施。哈，點不知康文署官老爺唔係急市民所急，新春假期，各區體育館居然拉閘拒客，市民想健身卻摸門釘，你話係咪靠害吖。
係咁嘅，今年農曆新年，康文署轄下九十五個體育館年初一及年初二全部休館，初三亦僅有二十八個場館重開，唔到三分之一。葵芳有熱愛運動嘅市民，本來諗住難得有連續幾日假期，打算同朋友一齊打吓波，做吓健身，結果大失所望。仲有吖，署方話年初三重開部分場館，但係成個葵涌區只有葵芳嗰間開，唔止好唔方便，仲分分鐘爆棚添。
講開又講，康文署有名你叫，專門為市民提供康樂文化服務，但新春假期體育設施關門大吉，話之你不得其門而入。乜鬼康文署吖，既不健康，更不文明，唔怪得康文署長期位居市民投訴榜頭幾名喇。
電視廣告都話喇，今時今日咁嘅服務態度係唔得o架。時代改變，政府服務態度亦要與時俱進，體育設施假日開放畀市民使用，好應該啫。話時話，家陣內地改變官場作風，上自國家領導人，下至鄉鎮幹部，每年最忙就係農曆新年，落工廠、農村甚至去偏遠山區慰問民眾，訪貧問苦。你可以話係做騷，但港府官僚連做騷都唔做，市民放假，佢哋亦放埋一份，一個二個周圍遊埠，影都唔見。問你服未！
港府口口聲聲「民生無小事」，一涉及自己利益就「民生話之你」，計太一叮話齋，呢支所謂世界上「最優秀公務員隊伍」，根本就係名不副實嘅山寨貨，叮！
第一手消息請下載on.cc東網
