開講有話，同行如敵國，不過凡事總有例外嘅，好似班反對派咁吖，拉布拉垮創科局，直頭為香港競爭對手送上「情人節大禮」。同樣有禮嘅仲有九巴，服務差到冇朋友，自己將客仔拱手送畀港鐵，港鐵都要講聲多謝o架。
呢，有政黨喺沙田監察三十三條巴士路線嘅服務，發現喺返工放工繁忙時間裏面，超過七成有脫班問題，平均延誤一至十五分鐘，最誇張嗰條線平均延誤近半粒鐘，搞到乘客大失預算。放工都算嘞，最多遲少少返屋企，如果返工下下遲到，分分鐘畀老闆炒魷，到時都唔知搵邊個算帳。
三間巴士公司之中，邊間脫班最嚴重？之唔係九巴囉。淨係本報投訴版舊年就接獲四百幾宗涉及九巴嘅投訴，其中近四成同脫班有關。有乘客甚至試過等車連轉車用咗超過一百五十分鐘，搞到連轉乘優惠都冇埋。好嘞，乘客等到唔耐煩，打去投訴熱線咩，等人接聽隨時仲耐過等車，真係畀佢吹脹。計太一叮話齋，九巴咁大牌，成日要人久等，不如索性正名「久巴」吖，笨！
話時話，巴士公司服務甩漏多多，班次唔準只係小兒科咋。家陣好多巴士殘殘舊舊，行行吓隨時跪低，早排仲有架突然着火燒剩棚骨，你話邊有人夠膽坐吖。
所以話啫，巴士公司乘客量好似王小二過年咁，一年不如一年，與其一味賴運輸政策向鐵路傾斜，不如檢討自己嘅服務質素好過喇。講真，唔少市民鍾意搭巴士多過搭港鐵，貪佢沿途有風景睇，又唔使喺車站行上行落咁麻煩，問題係巴士班次仲飄忽過無定向風，出門好難預時間，港鐵延誤始終叫做有個譜，市民兩害相權取其輕，咪惟有好似睇某大電視台連續劇咁，邊鬧邊搭囉。
講開港鐵，有樣嘢太一叮真係諗極都唔明。港鐵三日一小跪，五日一大跪，做下樣都要向當局交報告，點解巴士脫班又好，飛站都好，從來未聽過運輸署要求巴士公司交代呢？咁都未算，巴士公司為咗篤數，求其派架吉車出去走兩轉就當交咗功課，呢一招連牛頭角順嫂都知，唯獨高薪厚祿嘅運輸官僚唔知，簡直廢柴。最惡頂嘅係，巴士公司服務有口皆悲，居然好意思頻頻加價，而政府居然又幾乎次次開綠燈，真係唔到你唔服。
冇計喇，政府同政客爭拗不休，巴士公司就同港鐵鬥衰，結果咪市民遭殃囉，叮！
第一手消息請下載on.cc東網
