開講有話，光棍佬教仔，便宜莫貪。講係咁講咯，可惜唔少人財迷心竅，乜嘢「家訓」都當耳邊風。呢嗱，話口未完又有人中招啦。
話說近日有大批比特幣投資者無法聯絡交易平台，亦無法提走戶口內嘅比特幣，加上網上瘋傳負責人已經走佬，梗係出大事喇。據估計苦主有成三千人，涉及金額高達三十億元之巨，有人投資上千萬，有人不惜賣樓甚至走去借大耳窿，有位逾八十歲嘅婆婆更加瞓晒身將三百萬元棺材本全數投資添。原來當初有地產代理向佢落嘴頭，話投資一年就可以賺兩間價值二、三百萬元嘅鰂魚涌「屋仔」，婆婆信以為真，家陣真係喊都無謂。
唔係啩，一年賺一個開？稍為諗吓都知冇咁大隻蛤乸隨街跳啦。最搞笑嘅係，地產代理向人推銷金融產品，咁都有人落疊，唔怪得光頭佬賣生髮洗頭水都有市場啦。
不過話又講番轉頭，雖然投資嘅嘢有賺有蝕，扑錘前一定要計清楚風險，但唔代表當局可以關人個關。本報早喺舊年已經警告，本港對比特幣完全零監管，不法之徒隨時利用嚟洗黑錢或其他網絡犯罪，可惜言者諄諄，聽者藐藐，港府淨係口頭提醒市民注意相關風險，乜都唔做，一味推卸責任，唔爆大鑊至奇喇。
可能有人會話，比特幣始終係互聯網經濟下嘅新興事物，制訂規管條例都要時間。嗱，呢種講法要戒啦。查實比特幣呢家嘢話新又得，話舊都得，本質上同網絡遊戲嘅積分、武器差唔多，要規管唔係咁難啫。再講，好多國家同地區早着先鞭，好似瑞士咁，早前已正式將比特幣定義為虛擬貨幣，美國紐約亦開始就比特幣牌照進行諮詢，而內地更加索性全面封鎖添。講到底，要監管虛擬金融，辦法唔係冇，睇吓當局有冇決心嘅啫。
點都好喇，虛擬金融亦係金融，絕對唔可以放任自流。幾年前雷曼風波搞到唔少人雞毛鴨血，就係因為港府大開中門，有人睇中呢一點，咪專揀香港興風作浪囉。所以話啫，當局家陣對比特幣冇監冇管，講得好聽係唔識變通，講得難聽直頭係開門揖盜呀！
唉，三千個苦主背後有好多家庭，佢哋畢生積蓄就咁付諸東流，背後都唔知有幾多悲慘故事。官不殺伯仁，伯仁因官而死，睇嚟光棍佬嘅「家訓」都要與時俱進，改為「政府莫信」咯，叮！
第一手消息請下載on.cc東網
