曹貴子（左）呼籲市民患病記得要戴口罩，旁邊為太太Maggie。
話說仁愛堂早前喺沙田馬場舉辦盃賽，領導層同政商界名人都有現身撐場，對於最近流感來勢洶洶，本身係醫生嘅副主席曹貴子話，由於市民嘅衞生意識高咗好多，依家即使有流感，情況相對都唔會好似以前咁嚴重，不過佢都奉勸市民，如果知道自己有病，最好新年時唔好去年宵市場等人多嘅地方，又或者記得戴口罩。
吳明珍（左）同史顏景蓮齊齊支持仁愛堂盃。
張嘉齊（右）及丈夫每年都會去三亞探朋友。
一如好多做過慈善團體主席嘅人都話，在任嘅時候通常都忙足成年，更莫講話想行開去旅行，將於三月尾落莊嘅仁愛堂主席吳明珍，依家未有時間諗去邊，等到正式落莊時先計劃都未遲喎。
史顏景蓮一家澳洲度歲
即將於四月接棒主席嘅仁愛堂副主席史顏景蓮預計，來屆工作會好充實，計劃去澳洲過暖笠笠農曆年假，加上香港馬主協會於悉尼當地會舉辦盃賽，佢老公史立德亦會幫忙到當地籌備，二人可以一齊去放假呼吸新鮮空氣。
過熱辣辣農曆年假期嘅仲唔止佢哋，總理張嘉齊亦話每年農曆年都會同家人去三亞，因為佢哋喺當地有啲朋友，氣氛熱鬧之餘，仲有佢哋一家至愛嘅陽光與海灘，諗起都開心。不過，佢話兩個小朋友早排發燒，雖然依家好番啲，但都要勤做運動鍛煉身體。
第一手消息請下載on.cc東網
