曾俊華
施政報告早前提出放寬補充勞工計劃，財爺「鬍鬚曾」曾俊華喺最新網誌提到，一○年開始資助建造業議會嘅人力培訓工作，包括資助承建商以「先聘用、後培訓」方式提供培訓津貼，吸引新人從事人手短缺嘅工程，佢否認培訓計劃學員係「廉價勞工」，事關以零售業「職」學計劃為例，僱主一個月會畀番月薪五千五百元，加上補貼二千五百元學費，都成八千蚊一個月，應該算不上係「價廉」。
「鍵盤戰士」鬍鬚曾喺最新網誌提到上周三見證「零售體驗廊」開幕，其後提到香港有啲行業面對勞工短缺，青黃不接，一直聯同相關業界積極應對，舉例指建造業方面，至今已經培訓幾千學員，吸引到唔少年輕人入行。佢強調將學員招聘、訓練、實習同就業配對等工作有系統地連貫起來，提供切合實際嘅培訓，配合適當津貼，有效行業宣傳，應有助行業紓緩人手短缺限制。
第一手消息請下載on.cc東網
