俗語話，橋唔怕舊，最緊要受。當局趕絕桂林街夜市惹來爭議，可能為咗補鑊啩，新一份財政預算案建議引入外國流行嘅美食車（Food Truck），呢條橋聽落幾吸引嘅，但究竟行唔行得通，仲要睇過至知，最怕畫虎不成反類犬，咁就真係得啖笑咯。
財政司司長曾俊華係咁講嘅，打算以發牌形式推出美食車，喺唔同景點及人流集中嘅地方擺賣高質素食品。乜嘢係高質素食品？佢認為可以參考北美售賣熱狗嘅美食車，仲講到明魚蛋、雪糕免問喎。唔知鬍鬚曾係咪讀得番書多，以為外國月亮特別圓，所以，飲嘅係外國咖啡，睇嘅係法國電影，食嘅係北美熱狗，連美食車概念都抄足人哋條橋，真係服咗佢。唔怪得有立法會議員批評佢「全盤西化」，扼殺本土美食生存空間喇。
係咯，既然推廣美食，點解要全盤西化呢？點解唔可以中西合璧呢？鬍鬚曾後來補鑊話，只要符合衞生等規範，美食車亦可以售賣魚蛋牛雜，仲話希望本港美食車具創意，有本地特色喎。
其實，唔同地方有唔同嘅文化背景，亦有唔同嘅飲食習慣，美食車喺外國無疑好受歡迎，香港借鑑人哋嘅經驗無可厚非，但如果照搬照抄，唔適合本地居民嘅口味同需要，講乜都係假。正如有人話齋，淨係賣熱狗、啤酒、糖果呢啲所謂美食，便利店都有喇，如果能夠兼賣本土特色小食，唔止本港市民歡迎，內地及外國遊客亦會印象深刻。
冇錯嘞，香港係中西文化交匯嘅地方，美食車唔止要有外國風格，更加要有本土特色，否則，一味東施效顰，盞弄巧反拙嘅咋。話時話，香港唔少特色小食例如魚蛋、牛雜、蛋撻、雞蛋仔等等，深受遊客歡迎，吸引力絕對唔會輸畀熱狗，鬍鬚曾連呢啲常識都唔知，證明佢高高在上，脫離實際。最好笑嘅係，當被問到有冇幫襯過雞蛋仔同牛雜等小食，佢就話自己食齋多喎，簡直九唔搭八。
正所謂，條條大路通羅馬，要推廣美食，吸引遊客，除咗可以引入美食車，仲可以發展夜市。好似台灣同新加坡咁，唔少夜市搞到有聲有色，成為遊客必到景點，反觀香港依家仲未有一個似樣嘅夜市，簡直羞家。計太一叮話齋，港府與其趕絕桂林街小販，不如搵個地方打造夜市，咁好過引入所謂美食車喇，係咪！
第一手消息請下載on.cc東網
