古人教落，愚者千慮，必有一得，真係一啲都冇講錯o架。好似鬍鬚曾咁吖，理財能力差過小學雞，年年預算案變失算案，市民茶餘飯後唔愁冇笑料。不過咁，佢老哥提出引入外國流行嘅美食車，都叫做有番多少建設性啦。
即係咁，對於美食車呢個建議，市民普遍認為有得搞，至於美食車會唔會搞得成功，太一叮冇水晶球，暫時答唔到，但係有個好消息可以同大家分享。鬍鬚曾講明「出口唔出手」，淨係負責sell橋，具體點做由其他人跟進。哦，咁都好啲，冇佢添煩添亂，已經係邁向成功嘅第一步啦。
咁落手落腳嘅官員又點講呢？商務及經濟發展局局長蘇錦樑話喎，每輛美食車投資成本大約數十萬元，入場費比開間餐廳低，希望幫到年輕人創業。目前本港無牌照規管美食車，當局初步考慮以食品製造廠牌照形式，等美食車可以喺固定地點試行，遲啲再檢討點樣改善，佢仲話希望將美食車發展成旅遊景點添。
咁又係呀，家陣租魔肆虐，依家架車即係間舖，咪唔使再畀地產霸權飛擒大咬住搶囉，啱晒小本經營。仲有呀，本土特色美食多籮籮，魚蛋、蛋撻、雞蛋仔、仲有前廉記一哥貪湯都要向貴賓推介嘅牛雜……真係十隻手指都數唔完，要發展到好似台灣同新加坡夜市咁，成為旅客必遊景點，唔係冇可能o架。不過咁喎，港產官僚出名眼高手低，捉到鹿都未必識脫角。有辦你睇，當年天水圍街坊自發搞天光墟，不知幾咁熱鬧，點知後來當局接手管理，竟然化神奇為腐朽，成個場當堂水盡鵝飛。美食車前景係點，真係好難唔令人擔心咯。
講開小販檔，唔知係咪早排深水埗桂林街夜市因為執法問題，搞到滿城風雨，港府尋日建議檢討簽發新嘅固定攤位小販牌照，以及檢討簽發新嘅大牌檔牌照，同時會考慮將部分公眾街市改建為美食中心，並設立露天小販市場同夜市喎。都係嗰句啦，發新牌唔難，點樣管理規範至係關鍵。搞得好好睇睇就夜市囉，搞到污糟邋遢，噪音擾人，七國咁亂，到時盞「惹事」嘅咋。
正如行會成員嘅手機短訊話齋，美食車冇鬍鬚曾參與，係成功「必要」但「唔足夠」嘅條件。唔該港產官僚今次做番齣好戲，咪一陣又點金成石，美食車變毒食車，咁就該煨嘞，叮！
第一手消息請下載on.cc東網
