啟德冇得飛，趙式芝貪玩喺醒獅後面擺出飛機起飛嘅姿勢。
趙世曾嘅女兒Gigi趙式芝早前以主席身份，出席位於啟德直升機場嘅香港飛行總會新春活動，仲進行醒獅點睛儀式，同場亦見到鍾意飛嘅王敏德，帶埋太太同細仔嚟捧場，場面相當熱鬧。
趙式芝為醒獅點睛。
「啟德常客」王敏德帶老婆同細仔撐場。
被問到啟德直升機場已被勒令停飛，係咪好傷心？Gigi即時好無奈咁話，香港飛行總會已經有九十年嘅歷史，想唔到最後會有咁嘅結局，佢又話：「真係好無奈同可惜，依家可以飛嘅地方愈來愈少，只有石崗軍營機場，而且只係周末、周日先開放，申請又要花好多時間。以前呢度每年都會同慈善機構合作，邀請一千個低收入家庭嘅小朋友飛上天空，等佢哋體驗空中飛行，依家變相好難做到呢項善事。」
或辦直升機展覽
咁呢度唔准飛行，又有乜打算呢？Gigi話：「以前可以自由自在飛行，依家可能會搞啲直升機嘅展覽，同埋同飛行有關嘅活動，變咗唔係喺空中，而係陸地解釋飛行嘅教育，紙上談兵。」
Gigi熱愛飛行，所以就算接咗爹哋棒，榮升做卓能嘅執行副主席，佢亦百忙中抽時間打理飛行總會嘅事務。問到工作上係咪已經上軌道？佢話：「工作仲要時間去適應，好忙，要花好多時間。」
其實，王敏德都係啟德嘅常客，不時喺嗰度飛行，對於停飛，佢感到既難過又傷心。
第一手消息請下載on.cc東網
