一罐可樂分乾濕 硬膠環保冇朋友

係咁嘅，第二階段膠袋徵費計劃四月一日實施，徵費範圍將會擴大到全港超過九成、約十萬間零售點，夠晒大陣仗。到時無論買衫褲鞋襪、書籍文具定係幫襯髮型屋買護髮用品，顧客每攞一個膠袋都要畀錢，多謝盛惠至少五毫子。保護環境人人有責一啲都冇錯，少用膠袋的確係好事，可惜吖，港府做嘢一向唔湯唔水，甩甩漏漏，好事隨時會變壞事。呢，好似買麵包咁，由於入袋後冇密封，按照新例顧客仲可以攞多個免費膠袋，即係買兩個菠蘿包，一個包一個袋，再外套一個袋，咁咪即係一加一等於三囉！

原來新例之下，所有冰凍食品同冇密封包裝嘅食品一律豁免膠袋稅，換言之，日後魚檔、肉檔同蔬果店亦可以照辦煮碗，送「袋中袋」，唔使問阿貴，即係膠袋要用幾多有幾多喇。更怪雞嘅仲有「一貨兩制」添，嗱，同一罐可樂，由貨架攞同從雪櫃攞，「待遇」會有分別，前者係「乾貨」，用袋要畀錢；後者係「濕貨」，用袋可免費。你話嘞，有關新例幾咁荒謬，減少膠袋點可能成功吖。

仲有喎，你有張良計，我有過牆梯，只要店員或顧客略施小計，一樣可以規避新例。好似家陣最賣得嘅散裝瓜子等賀年糖果零食咁，店員通常會將產品用機「啤實」，按照新例密封食品屬徵費範圍，但如果產品唔密封，又或者喺密封袋篤個窿，就可以慳番五毫子，新例好明顯有漏洞喇。

所以話啫，官僚無能到極，擴大膠袋徵費範圍初衷雖好，但隨時造成反效果，因減得加。唔係咩，港府咁多年來推出嘅環保政策及措施數不勝數，可惜唔係半途而廢，就係雷大雨小，甚至弄巧成拙。再以垃圾分類及回收工作為例，淨係識得用三色回收箱唔在講，仲搞到同垃圾桶比例嚴重失衡，部分地區每三十幾個垃圾桶至有一套回收箱，叫人點樣分類吖，點樣回收吖，直頭係虛應故事喇！

即係咁，港府搞環保係假，推卸責任就真。膠袋徵費、垃圾徵費、玻璃樽徵費、電器徵費，名目繁多，樣樣都要市民負擔，幾時見過港府有承擔！香港要減少膠袋，減少呢班「膠」頭「膠」腦嘅官僚先喇，叮！