劉鑾雄（左）晚上落車時右手一度微顫。旁邊為甘比。
華人置業前主席劉鑾雄（大劉）因涉及澳門巨貪案而被澳門初級法院判監五年三個月，佢已申請上訴，但依家仲未排到期。尋日大劉兩度到灣仔富豪飯堂用膳，其中大劉喺晚上下車時，佢右手拿住拐杖先放落地借力，見佢右手微微顫抖，雙腳踏地時似乎有啲吃力，唔通係因為擔心單官司？
尋日中午大劉同呂麗君坐車到灣仔富豪飯堂，三名保鏢在旁守候，大劉先行步入飯堂，依舊需要撐住拐杖步行，行動都頗為緩慢，呂麗君手抱兒子跟隨其後，大劉女兒尾隨其後，而於十分鐘後，大劉母親同大劉妹妹劉玉珍，以及一女友人亦到飯堂，同佢哋會合，大劉等人大概用咗一個鐘食飯，然後分乘兩座駕離開。
喺晚上六時許，大劉母親同劉玉珍先到灣仔富豪飯堂，大劉同甘比稍後亦一齊到來，係佢一日內第二度在此現身，因當時下雨，兩名保鏢撐起雨傘為二人擋雨，而大劉下車時，持拐杖嘅右手一度微顫。而事有巧合，約晚上七時，東亞銀行主席李國寶夫婦亦到灣仔富豪飯堂用膳，未知有冇同大劉交談。及至晚上七時許，大劉等人一齊離開，當問及其雙腳情況時，大劉不發一言，上車時更見佢用紙巾抹頭，似乎係被雨水弄濕。
第一手消息請下載on.cc東網
