設計圖片及對白
因應立法會五大選區人口變化，有傳政府會微調明年立法會選舉港島區同九龍西議席數目，前者由七席減至六席，後者由五席增至六席，據聞建制政黨都對新增嘅九西議席虎視眈眈，建仔嘅立法會九西直選議員、有「政壇元秋」之稱嘅Ann蔣麗芸率先表態，話建制會積極考慮派出黨內新人搶奪新增席位；泛民方面就反應迥異，其中白鴿黨嘅九西直選議員「一舊雲」黃碧雲表明無意搶灘，反而擔心因參加年底區選而成立嘅泛民團體同該黨新人「撞區」，會令建制派漁人得利。九西呢「兩舊雲」嘅處境同心境，真係上天落地咯。
政界熱傳明年九西直選會新增議席，阿Ann同一舊雲兩名九西直選議員尋日分別舉行新春團拜，兩人仲帶埋黨內幾位新人齊齊同傳媒拜年。
阿Ann尋日同老公梁海明等人喺九西漾日居同傳媒新春團拜，據知阿Ann喺前年以二千多萬元購入呢個逾千呎單位，佢又一度歌癮大發，即場獻唱已故歌手梅艷芳主唱歌曲《心債》，唔知當時坐喺窗台嘅梁海明，有乜感受呢？
其中一二年以最高票四萬七千多票當選嘅阿Ann，揚言如果有關消息屬實，建仔有機會攞多一席，黨內會積極考慮派黨內新人競逐。佢並自爆，深水埗區議員鄭泳舜同油尖旺區議員葉傲冬都有機會代表建仔出選，不過最終邊個可以脫穎而出，就要再觀察多一段時間。
阿Ann形勢壓一舊雲
阿Ann講到甚有信心，但係一舊雲就好擔心，如果白鴿黨到時分兩條隊出選，分分鐘會互相搶飛，最後落得兩敗俱傷。一舊雲其後又提到年底嘅區選，表示白鴿黨預料將派出八位社區主任挑戰現任建制派區議員，本來同現任區議員對撼已經非常困難，點知佢哋近來更加發現名為「青年新政」嘅泛民政團喺正佢哋想選嘅區內「插旗」。
一舊雲話，雖然佢哋歡迎多啲泛民政團參加區選，打破由建制派壟斷區議會嘅局面，白鴿黨亦樂意向佢哋傳授區選策略，但對於部分政團同佢哋「撞區」，佢話該黨會試下呼籲佢哋轉區，不過如果對方仍然堅持唔肯走，佢哋就惟有硬住頭皮迎難而上喎。
第一手消息請下載on.cc東網
