正所謂，剃人頭者，人亦剃其頭。過百名示威者尋日浩浩蕩蕩踩入元朗，聲稱要「光復」元朗，趕絕水貨客喎。可惜吖，當區居民唔領情不特止，仲話佢哋攪亂檔添。今勻輪到示威者淪為過街老鼠，一嘗被辱罵包圍追擊嘅滋味，你話係咪唔衰攞嚟衰吖？
先撩者賤，打死無怨。以前係內地旅客被示威者追住鬧，家陣輪到示威者被人圍住炳，真係唔抵可憐o架。講真，示威團體既然打着取消一簽多行嘅旗號反水客，係咪好應該將槍頭對準政府，而唔係貿貿然走去新界鄉村搞是搞非？再講吖，天下熙熙，皆為利來，內地食品及產品質量問題一日唔解決，即使取消一簽多行，充其量只會令水貨活動變成港人專利，根本杜絕唔到水貨問題，盞嘥氣嘅啫。
即係咁，香港旅客人滿為患，水貨活動氾濫成災，市民不滿絕對可以理解。之但係，咁係咪等於可以罔顧法紀、破壞秩序呢？香港人經常批評內地人唔文明，如今嘅所作所為又有幾文明呢？台灣作家龍應台有本大作叫《請用文明來說服我》，示威者真係好應該睇吓，咪成日五十步笑百步吖！
咪以為「光復」行動只係小打小鬧，其實對香港形象殺傷力極大。近日有內地網民發起剪爛往來港澳通行證行動，而今個農曆年訪港個人遊旅客更錄得近十年來首次跌幅，已經係一個警號。旅遊業係香港經濟支柱之一，萬一呢條支柱冧咗，香港經濟玩完都似，點止恒指跌一千點咁簡單。
冇錯，個人遊衍生水貨亂象，呢個係事實，但成件事嘅起源，係沙士後香港經濟跌落谷底，香港主動要求中央開放個人遊救市。家陣經濟向好就打完齋唔要和尚，乜嘢不滿都入晒內地旅客數，點都講唔通。至於衍生水貨亂象嘅深圳居民來港「一簽多行」政策，更加係前特首貪曾嘅功勞，佢仲爭取過深圳非常住居民來港一簽多行同埋珠三角居民來港自駕遊添，好在因市民反對而胎死腹中，唔係就更大鑊。冤有頭，債有主，要鬧都鬧貪曾喇，關其他人乜嘢事吖。
有人話貪曾係無間道，一啲都冇講錯o架，家陣香港亂象沒完沒了，中港矛盾火上加油，貪曾一定笑得好開心咯。點講都好，有問題就要解決，港府咪話要開設邊境購物城及檢討個人遊政策嘅，咁就講多無謂，行動最實際，再拖落去暴亂都似，叮！
第一手消息請下載on.cc東網
