若問香港依家最受關注嘅問題係乜？相信好多人都會認為係房屋。尋日青年事務委員會舉辦嘅青年高峰會議，勞工及福利局局長張建宗（小肥張）係其中一個嘉賓，佢喺呢個名為「青年眼中的機遇與未來」座談會上，同青年人分享吓就業及成長機遇，不過，有青年更關注政府點樣解決「上車」困難嘅問題，小肥張一聽即刻耍太極，以唔屬自己管嘅政策而拒答！其實，佢貴為今屆問責官員中嘅投資好手兼樓王，分享吓置業之路，絕對有資格噃！
小肥張喺論壇中被青年問到呢個問題，佢回應時以姓氏做開場白：「我姓張，不過唔係（運輸及房屋局局長）張炳良！」跟住佢就解釋，房屋並唔係自己負責嘅政策範疇，但政府好重視市民上車及居住問題，仲爆料話，特首每日舉行早禱會（官員參加的早晨會議）時，都會跟進房屋規劃議題。至於點樣跟進，佢就冇再細談，緊守不在其位、不謀其政嘅規則。
自詡「展翅之父」
其實，小肥張講政策可能逾矩，但佢都可以分享吓置業之道，事關小肥張喺官場一向有「樓王」之稱，按去年最新公布嘅資料，佢同家人共持有九個物業，成為問責官員之首，而且置業地點不但衝出香港，仲好有地球村味道添，如果要論置業、做業主嘅經驗，睇怕張炳良都未必夠佢多，所以，由張局長講吓佢嘅「上車」經驗，青年人睇怕都好有收穫。
雖然，小肥張唔肯講上車，但就好樂意講青年培訓，當有人問佢點睇投身技術性行業，小肥張話透過學徒培訓，行行都可以出狀元。講講吓，仲吹水話當年擔任勞工處處長時，一手推動展翅計劃，仲自詡係「展翅之父」喎！
第一手消息請下載on.cc東網
