社會撕裂多是非 走火入魔最可悲

呢，油麻地有間書店舉辦一項以警員為主角嘅攝影展，店方聲稱希望透過唔同相片，讓觀眾從唔同角度認識警察，本來同政治無關，點知引起各種猜測及爭議，有人出言辱罵及恐嚇，有人質問展覽係咪「撐警」，亦有人質疑「抹黑」警察。店方為員工安全着想，被迫將展覽腰斬，仲發表聲明澄清冇任何立場添。

喂，舉辦攝影展啫，咁就要受到圍攻，有冇恐怖啲吖？香港係自由多元嘅社會，連一個攝影展都容納唔到，同專制社會有乜分別？所以話，香港真係撞邪，愈來愈不可理喻，尤其係佔領行動更加令唔少人黑白混淆，是非顛倒，幼稚園老師教小朋友「警察係壞人」，有醫生拒絕為因執法受傷嘅警員診病，家陣連一個關於警察嘅攝影展都搞出咁多是非，簡直匪夷所思。

冇計喇，佔領之亂令本來已經高度政治化嘅社會進一步撕裂，部分人走火入魔，為反而反，愈嚟愈偏激，愈嚟愈暴力，有乜法子唔搞到七國咁亂吖。就好似近排嘅反水客鬧劇咁，部分滋事分子已失去理性，幾乎見人就罵見人就打，連長者同婦孺都唔放過，你話仲有冇天理？

最離譜嘅係，反水客鬧劇引起天怒人怨，暴徒淪為千夫所指，激進組織不知收斂，反而變本加厲，除咗計劃趁禮賓府周日開放搞事，仲揚言將反水客行動升級，一日之內「光復」幾個地區，點起多個火頭，睇嚟佢哋唔搞死香港係唔會收手嘅喇。

雖然話激進組織屬於烏合之眾，來來去去都係一百幾十人，但對市民及旅客造成嘅滋擾，對社會及經濟嘅破壞力，絕對係災難性o架。旅遊業人士指出，反水客示威對旅遊業嘅影響陸續浮現，今年訪港旅客較去年同期下跌半成至一成，上月酒店平均入住率下跌近兩成，本月首周內地旅行團更由去年嘅四百幾團跌至只有一百幾團。更弊嘅係，唔止內地客對香港敬而遠之，有啲同樣講普通話嘅東南亞旅客亦因為擔心殃及池魚而放棄訪港，唔怪得業界擔心旅遊業及零售、酒店等行業隨時步入寒冬喇。

計太一叮話齋，如果港府再唔依法辦事，嚴懲暴徒，再咁落去，香港遲早自己玩死自己嘅咋，叮！