設計圖片及對白
官場中人同立法會中人成日都話行政立法關係惡劣，但就好少人主動邁出第一步。尋日立法會泛民議員又循例舉行飯盒會，今次就有個特別嘉賓，財經事務及庫務局常任秘書長謝曼怡破天荒殺落飯盒會，向泛民議員硬銷未來基金，呢個會係泛民議員聚頭、傾吓議會事務嘅非正式場合，竟然有官員瞄準呢個檔期，即使又食又傾講唔到好具體嘅公務，但一人行一步，對改變議會氣氛都有一定好處噃。
政府早前成立長遠財政計劃工作小組，話要透過成立「未來基金」，為嘅係防範未來出現結構性赤字，但外間就批評當局有意趁機將納稅人啲錢收收埋埋，謝曼怡四出解畫，估唔到連泛民每個星期五中午嘅飯盒會檔期都唔放過。
曾就公民廣場起閘會面
據悉，尋日飯盒會議題唔少，但時間花得最多嘅係畀謝曼怡簡介未來基金，雙方足足討論咗接近一小時。其實飯盒會以往好少有官員列席，試過幾次，都係泛民主動搵官員出席。有泛民議員話，對上嗰次同官員見面，應該係去年七至八月，因應政府總部決定喺俗稱「公民廣場」嘅東翼前地對開起閘加強保安，佢哋就搵咗行政署署長蔡潔如到飯盒會解畫。
反而今次嘅會議，就係由謝曼怡主動提出，佢話想向泛民議員講解未來基金。會上議員對此都有好多意見，好似質疑政府唔應該只係用喺投資，而應該將錢用喺全民退休保障等長遠政策。
有議員問政府經常性開支係咪要儲咁多；亦有人問，設立呢個基金毋須經立法會批准，究竟議會有咩角色監察喎。
不過，泛民議員話，謝曼怡會上只係講解基金構思，以及聽意見為主，冇乜具體回應，亦冇講會唔會去立法會財經事務委員會交代喎。
第一手消息請下載on.cc東網
