「公職王」陳智思又有新任務，專責減鹹減甜。（資料圖片）
健康飲食成為潮流，唔少飲食集團都會搞吓「綠色星期一」活動配合健康飲食嘅風潮。估唔到政府都咁有潮流觸覺，尋日宣布成立「降低食物中鹽和糖委員會」。究竟呢個委員會做啲咩呢？原來委員會主要工作係透過推廣同教育，推動少鹽少糖飲食，監察食物入面鹽和糖嘅含量，避免市民因為食得太多鹽，增加患高血壓、中風及心臟病嘅風險，食得糖多，又會導致肥胖同蛀牙。
咁特別嘅委員會當然要有特別嘅成員啦，除咗「公職王」行政會議成員陳智思擔任主席，仲有搞笑能手林超榮、前女主播兼舞台劇演員魏綺珊、翠華集團主席李遠康、鴻福堂總經理司徒永富及消委會總幹事黃鳳嫺，相信各委員對健康飲食都各有一番理解，開會肯定好戲連場！
珠姐話唔選人大
講開公職，港區人大代表團團長譚惠珠於北京向傳媒話，自己依家六十九歲，下屆唔會再參選人大，因內地有「七上八落」潛規則。
第一手消息請下載on.cc東網
