設計圖片
今年六、七月，政改方案就會喺立法會表決，立法會主席曾鈺成預言今年夏季會再爆發大規模抗爭行動，空穴來風，未必無因，泛民中人近日已經動作多多，繼外號「李漢奸」嘅民主黨創黨主席李柱銘遠赴加拿大、乞求干預香港政改問題後，同台獨勢力一直關係密切嘅華人民主書院更裏應外合，組隊赴台會合太陽花學運領袖，今次仲有事先張揚要辭職、引發公投嘅白鴿黨立法會議員何俊仁（AV仁）添，唔通佢哋為下一波佔領行動做部署？
與「太陽花學運」人物交流
華人民主書院校長、社民連前主席陶君行今日啟程赴台，出席周日起一連兩日舉行嘅台港社運交流研討會，同行嘅仲有AV仁及真普聯召集人鄭宇碩。據了解，兩日研討會會回顧同檢討太陽花學運同佔領行動，喺佔領期間涉嫌遭警員毆打嘅公民黨成員曾健超、社民連立法會議員梁國雄（長毛）、民陣副召集人楊政賢等都會參與。
AV仁承認，今次一定會同太陽花學運嘅核心人物有交流，「（民進黨前主席）施明德都有份」，陶君行就話，同類型研討會已經搞過兩次，今次只係恒常交流，冇乜特別啫。不過，工黨主席李卓人前年同「佔領中環」發起人朱耀明等人訪台，又係向施明德會面「求教」，當時泰國爆發大規模示威，李卓人都公開話要向當地反政府運動「取經」，希望「搞大」佔中，結果一語成讖。今次又嚟多鋪，真係唔到你唔驚。
第一手消息請下載on.cc東網
