現今社會追求男女平等，但原來香港好多上市公司嘅董事會中，女性所佔嘅比例仍然好低。啱啱去完德國訪問嘅立法會議員劉慧卿就話，德國國會喺本月初通過法例，規定明年開始，上市公司董事會嘅成員中，女性所佔比例，最少要達到三成。佢尋日喺立法會會議上就相關議題質詢財經事務及庫務局局長陳家強，仲搞到有啲勞氣添！
陳家強話港交所一二年嘅時候曾經就「董事會成員多元化」進行市場諮詢，當中包括董事會成員嘅性別比例。自從呢次諮詢後，上市公司董事會嘅女性比例由當年嘅百分之十點三，提高至去年嘅百分之十一點三；董事會中完全無女性成員嘅情況亦有改善，由一二年嘅百分之四十點三，減至去年嘅百分之三十七點八。
但卿姐唔多滿意有關答覆，認為百分之十一點三仲係好差，仲羅列出其他國家嘅數字，話呢啲國家都係香港嘅貿易夥伴同競爭者，質疑女人係咪冇能力入董事會。其實又難怪卿姐咁勞氣，睇番政府三司十二局司局長都係得一個女人咋。
第一手消息請下載on.cc東網
