怪事處處有，香港特別多。好似法援制度咁，原意係保護弱勢群體，前排幫擺明違法嘅佔領人士打官司，已經夠離譜，依家居然發展到幫人嚟香港攞着數，倒納稅人米，你話係咪荒天下之大謬吖！
太一叮講緊嘅，之唔係近年迅速崛起嘅南亞裔難民大軍囉。講出嚟嚇親大家，前年每月平均只有廿幾宗南亞裔難民申請，過去一年飆升至每月約七十宗。上個禮拜之嘛，一日內竟然有十三名南亞裔男子分乘兩班航機抵港，咁大規模，連入境處都話聞所未聞，都咪話唔誇張。而最蹺蹊嘅係，喺呢個時候，入境處收到一名南亞裔律師通知，話會代表嗰十三人提出酷刑聲請，聽講類似情況已經唔係第一次，之前甚至試過聲請人仲未抵港，已經有律師預早致電入境處「報料」，你話當中冇蠱惑喎，三歲細路都唔信喇。
即係咁，話佢哋嚟香港攞着數，唔係靠屈o架。有數得計，本港過去五年處理四千多宗聲請個案，其中獲確立可免遣返嘅個案得百分之零點五咁大把，亦即係話超過九成九都係假難民，法援幫佢哋打官司，同變相幫黑工嚟香港搵食冇乜分別嘅咋！
唔講唔知，近年納稅人花喺呢班難民身上嘅錢愈來愈多，由三年前嘅三億九千多萬元，勁升六成至下年度嘅六億多元。浪費公帑仲係其次，審核身份需時，難民平均滯留兩年幾，最長嘅甚至達十一年。問題係，難民獲發「行街紙」，你估真係行街咁簡單咩，衣食住行，在在需財，於是乎有人走去打黑工，有人偷呃拐騙，姦淫擄掠，販毒睇場，幾乎反轉香港咁滯。
呢，話口未完又嚟啦！警方尋日凌晨喺蘭桂坊截查一名酷刑聲請嘅非洲裔男子，喺佢身上搜出毒品。查實警方近月喺老蘭已經拘捕三十幾名毒販，大部分都係非裔人士，你慌唔係不法分子睇中難民膽正命平，好使好用咩。講真，蘭桂坊近年淪為「人間妖域」，都係多得呢班難民唔少。
講到呢度，太一叮忽然諗起內地流傳嘅最牛騙徒手機短訊︰「錢多人傻速來」。冇錯喇，既然香港來者不拒，仲出埋錢畀你打官司，唔嚟就笨咯。講多無謂，行動最實際，唔該港府拿拿臨補鑊，即使一時無法收緊難民政策，最起碼都要堵塞法援漏洞，又或者取消難民重災區嘅免簽證安排喇，叮！
第一手消息請下載on.cc東網
