SUN奇古怪：SUN潮語：【FF】
潮語「FF」唔好誤解係以前睇錄影帶VCD、DVD時候，想快速向前搜畫Fast Forward，更加唔好見到個「F」英文字母，就諗埋一邊聯想到一個「F」字頭粗鄙英語及行為。「FF」嘅意思其實有啲詩意，係「Final Fantasy」嘅簡寫，照字面解就係「終極幻想」。
人大常委會上星期正式就政改「落閘」，將民主派別，無論進取還是溫和嘅方案全面排除。莫講話連選區議員都不嬲有嘅「公民提名」肯定唔使旨意之外，仲要提委會過半數支持先可以出閘，仲要限制埋候選人數目。雖然最後都係一人一票選特首，但係呢種根本剝奪市民提名權嘅選舉，絕對係貨真價實嘅假普選。就同大陸嘅A貨，假酒假豉油假學歷假乜假物一樣造假，非常合乎國情。有好多建制派打手，港共政府官員，叫香港人「袋住先」，遲啲仲有機會改。但係，稍為對中國有少許認識的話，就知道如果「袋住先」，香港人就肯定蘇州過後無艇搭，民主一去不返。話雖如此，雖則話呢個係伊朗式選舉，但係偉大祖國嘅老百姓，六十年來連呢啲假票都未有！難怪四眼明不斷推銷方案，話係「靚女」，又係精品。我諗香港人要有真正嘅民主，真係潮語話齋……「FF」！
「FF」本來就係個經典電腦遊戲「Final Fantasy」（台譯太空戰士）嘅縮寫，呢個遊戲自1987年由日本遊戲開發商Square Enix（前身Square）推出至今，已到第十四代，係經典嘅「角色模擬類」遊戲（RPG），可謂陪伴過好多人成長。其中一集嘅主題曲，更由華人歌手王菲主唱。後來有網民，就用咗「FF」嘅直譯中文「最終幻想」之意，嚟形容有啲根本無可能達到嘅目標，例如瞓醒發覺周秀娜瞓咗响隔籬為「FF」。又或者一啲好想做而又無辦法去做到嘅事，都可以用「FF」去形容。講到香港人要有真正民主，到底係咪真係「FF」？呢個都要視乎香港人有幾大決心去爭取。所以與其「FF」，不如丟掉「幻想」，奮勇抗爭！
