政壇：吳得掂亂噏大躍進
政改大框架敲定後，政壇中人日噏夜噏，近日嘅焦點係大專學界要搞罷課，正當各界呼籲學生冷靜、有獨立思維嘅時候，主管教育嘅吳克儉（吳得掂）卻亂噏一通，話全國人大常委會就普選作出嘅決定係大躍進喎。知道多少內地發展史嘅人都明瞭，大躍進呢三個字可以話敏感、亦可以話負面，嗰段沉重嘅歷史，呢代中國人都好難忘記，偏偏吳得掂卻亂咁噏，唔驚引火燒身咩﹖
設計圖片
網民寸咪講多錯多
吳得掂尋日出席活動時，嗌啲學生花多少少時間去睇吓人大決定嘅所有內容，佢話︰「咁多年都冇（普選特首），今次由冇變有，可以二○一七年一人一票選特首，呢個咁大嘅大躍進。」呼籲同學從正面角度去看，佢講「大躍進」本嚟係讚美之詞，但唔同嘅人對政改決定有唔同睇法，所以有網民都即刻月旦吳得掂嘅「大躍進論」，仲叫佢讀吓歷史先，唔好講多錯多喎。
尋日其實好多人講政改，全國人大常委范徐麗泰就將政改比喻作有待養成嘅「五彩雀」︰「我哋係咪先攞咗隻雀仔先？係唔靚，唔係你想像中嘅五彩雀仔，但係唔靚嘅雀仔你都攞咗先，因為養養吓會變成你鍾意嘅五彩雀仔吖嘛！」而港區人大代表譚惠珠就警告，如果一七年冇得普選特首，立法會「拉布」問題就會持續，政府將無法施政，變成「空轉嘅引擎」咁話。
「佔領中環」發起人戴耀廷就以台灣嘅坑渠油風波做比喻︰「畀個地溝油做嘅菠蘿包你食，你食唔食吖？……我哋要拒絕，必然係否決一個地溝油菠蘿包式嘅方案！」立法會議員李卓人亦都話，接受人大框架下嘅普選有如「食假藥」，又話無論係屆時選出嘅特首定係人大常委會決定下嘅方案都係「爛橙爛香蕉」，泛民必須要否決喎。人人鬥爆金句，聽唔聽得入耳﹖就見仁見智嘞。
