警示磚變陷阱 路政署跣市民

係人都知，近年唔少行人路鋪設警示磚，靠凸起嘅圓形或長條形為視障人士引路，本來係好事，點知路政署敷衍了事，對承建商監管不力，導致部分警示磚日久失修，防滑不足，變成道路陷阱，莫講話視障人士隨時跣低，連視力正常嘅市民都隨時中招喇。你話嘞，警示磚淪為跣人磚，路政署係咪靠害吖！

唔係誇張o架，早前有位女士一出港鐵金鐘站，踩正被雨水整濕咗嘅警示磚，即時失去平衡跣低，搞到下唇爆裂流血，幾乎破相咁滯。正如佢話齋，感覺就好似踩到蕉皮，簡直係無妄之災。

話時話，金鐘位處中心金融區，亦係遊客雲集嘅地方，如果跣低嘅係外國遊客或者國際政要，咁就大鑊嘞，到時全世界都知道香港原來通街陷阱，你話幾咁失禮呢！

話時話，警示磚陷阱遍布全港，唔止鬧市，新界一樣係咁。例如大埔太和邨行人隧道，路面警示磚大部分殘殘舊舊，已經冇晒防滑沙，令人一步一驚心；又如土瓜灣馬頭圍道嘅警示磚，因為欠缺保養，邊緣凸起，途人隨時中招。有街坊投訴，有啲警示磚呢頭修補好，嗰頭又冇晒防滑沙，都唔知路政署究竟點樣做嘢。

唔使問阿貴，安全陷阱梗有一個喺左近，好明顯係路政署監管失職喇。署方係咁講嘅，過去三年接獲約十宗涉及警示磚防滑能力嘅投訴，其中一名市民曾經跣低，大埔及北區部分警示磚未符合摩擦系數標準，已經要求承建商盡快更換喎。其實，有區議員過去半年已經收到幾十宗相關投訴，並即時向路政署反映，證明真實情況比路政署所講嘅嚴重得多。始終都係呢句，信佢一成，雙目失明，官僚得過且過，又點信得過吖！

冇計喇，路政署做嘢求求其其，拖得就拖，大家早就見怪不怪咯。呢嗱，該署監管嘅大型工程包括高鐵、港珠澳大橋等等，有邊樣唔係嚴重延誤及超支吖？就算維修道路咁簡單嘅工程，都經常搞到甩甩漏漏，一拖再拖喇。所以話，港產官僚眼高手低，大事做唔嚟，小事多甩漏，旨意佢哋為視障人士引路，隨時撞板多過食飯，大家最好自求多福，以免踩正陷阱吖，叮！