Fundman睇市：越房 高處未算高

四連升後，港股終於斷纜，美股做好夾啱A股腳軟，港股高開低收，早市見過23,353點的兩個半月高位後，埋單倒跌32點，收報23,211點，主板成交縮近90億元，落返去560億元，升跌股份比例50對50，也是本周至均勢的一日（周一高位是69對31）。

基金繼續戀棧房託

二三線氣氛稍有收斂，沽空佔成交比例變動唔大，輕微由周三的9.16%回升至9.18%，連睇淡的大孖沙，都似乎想睇定形勢。技術上，恒指由年初高位23,944點跌到四月中低位21,423點，整個跌浪的0.764反彈阻力在23,349點，一旦升穿隨時可以改寫新高，淡友唔出嚟做攔路虎就勢係假。估計港股需要時間消化近一個月的升幅，先至有所作為。值得一提，六月份期指收22,855點，表面上好似比現貨23,211點大低水，但扣番除息實際高水86點，或多或少對後市有啟示。

近期一二三四線股氣氛通通好番，基金風險胃納明顯回升，有趣係防守性高，主攻收息的REITs，大孖沙始終不離不棄。領匯（00823）往績派息率跌至近3厘，唔少人當佢雞肋，偏偏就日日逐少少創新高。比較之下，晒士細些少，息率高少少的置富（00778）及越秀房託（00405），仲有追落後的情況，尋日雙雙創歷史新高。

早兩日越房發咗3.5億美元5年期債券，為現有貸款再融資，息率約3.1厘，相比目前6至7厘的成本低，有助降低利息成本。美林出報告，估計一三至一五年每單位派息會因此多2至3%。大行原先預測越房一三年每單位派0.293港元，現價4.73元，相當於一三年息率6.21厘，比較起上嚟，的確高過領匯的3.4厘及置富的4.46厘一截。

當然三隻REITs，兩隻資產在香港市場，越地主要收入則集中於新收購嘅廣州IFC，考慮到質素、資產集中風險及地理因素，要派息追到平起平坐有點奢望，但今次發債令短期有被重估空間，以息率去到6厘左右計，越房今浪破5元水平的機會存在。