樓市出更：旺區舖漲租 失晒威
五一假期內地旅客消費力減弱，唔少商戶話要睇定啲再租舖之際，出手亦無以前咁高。有代理同劉Sir報料，有間連鎖個人護理店僅以每月約100萬元預租旺角西洋菜南街一個由電話供應商租用嘅雙號舖，較上址現租金只係升咗約17%，咁少嘅升幅，喺嗰條街幾年都冇聽過，升幅可能仲少過同區二線街舖。
旺角西洋菜南街一地舖獲個人護理店成功搶租，呎租約五百元。（資料圖片）
近期一線街舖租賃個案
月前金行同化妝品店喪搶租旺角西洋菜南街龍頭舖，迎接五一假期內地客，點知消費數字比預期差，唔少商戶都話唔敢再搶租舖，所以近期條街大額租賃少番晒。
不過有代理話，西洋菜南街一個雙號地舖，早年由影音碟舖租用，兩年前由電話供應商搶租，面積約2,000幾方呎，月租料約85萬元，租期差唔多到期，淡市下，依家畀一間連鎖個人護理店租用每月約100萬元租用，呎租大約500元。
劉Sir知道，西洋菜南街已經有一間連鎖個人護理店，生意非常好，唔少內地同胞狂掃日常用品，佢對手眼見行家做到冇停手，點都要喺度開間舖，分一杯羹，但又唔想同金行正面「燒銀紙」搶租，咁啱遇着搶租潮高峰冷卻，即刻拍板承租。
金行貴一倍洽銅鑼灣舖
另外，銅鑼灣地舖貴為全球呎租最高地區，好難有商戶可以「偷雞」租到龍頭舖。有代理話，金百利商場地下一間由連鎖潮流服飾店租用約莫十年嘅地舖，由於附近人流勁旺，聽講有間上市珠寶金行想向業主提出洽預租，出手都唔低，月租講緊差唔多190萬元，同依家月租升約1倍，呎租超過1,100元。另外，同區利園山道有個地下連1樓雙號巨舖，畀間眼鏡店每月近190萬元租用，呎租都要1,100多元。
港島舖「招後」呎租飆53%
睇番差餉物業估價署資料，原來政府出招後嘅三月份，港島區商舖平均呎租差唔多184元，按月飆升超過53%，升幅幾年來算勁，而九龍區平均呎租都有159元，按月升超過32%，而該月商舖租金指數報160.5。而三月份中區甲級寫字樓平均呎租約96元，而灣仔同銅鑼灣的平均呎租約69元，兩數字都按月升逾11%。
