股海實戰：金風科技 有力突破

蒙牛（02319）前日宣布增持現代牧業（01117）至成為單一最大股東，作價唔貴兼可鎖定長期原奶供應，奇怪前日股價冇動靜，到尋日先至起步，高位見23.75元，收報23.4元，升7.3%。只係，24至25元水平阻力非輕，短炒有利潤者，再升一浸可考慮先走一轉。

富士康有留意價值

被內房企業綠地入主嘅盛高（00337）復牌，股價急升逾八成，內房企業又再一次點石成金！連日股價受壓嘅創維（00751）同TCL多媒體（01070）個別發展，創維升3.9%，TCL多媒體則再跌3.5%。除咗補貼到期因素外，近日內地樂視網推出新智能電視機產品，60吋賣七千人仔，難怪傳統電視機股即刻發軟蹄！聽講呢個新產品用夏普面板及高通處理器，再由富士康（02038）組裝，陣容唔錯，若然銷情佳，照計富士康都有得炒，見其股價由上月低位2.6元，升到上尋日高位見3.35元，可以多望兩眼。

阿莊講過，要提防風電股炒到咁上下會抽水，畢竟風電企業資本承擔大，負債偏高。不過，若然風電業經營環境持續改善，年內料會增加投資裝備，情況有如近期傳統電力股股價受惠煤價創三年新低而迭創五十二周新高，近周就連電力設備股都起動，皆因憧憬電企增加設備投資。

同一道理，唔敢追入風電股唔緊要，可以轉炒做上游產品嘅風電設備股。好似三月中旬阿莊提過嘅金風科技（02208），首季度錄得純利3,246萬元（人民幣．下同），同比增4.2倍，符合去年度業績報告預期，而季度業績預計，今年上半年純利將介乎7,206萬至1.08億元，如無意外，今年應可扭轉連續兩年盈利倒退嘅局面。

金風過去年半受制於5元（港元．下同）水平，但隨着基本因素改善，股價底部支持不斷上移，若嚟緊經營數據對辦，重估潮推動下有力向上突破，中期目標維持睇5.4至5.5元，支持位上移到4.2至4.4元區域。