魚缸Blogger：蒙牛乳業走勢好轉

蒙牛乳業（02319）以31.77億元收購現代牧業（01117）26.92%權益，市場消化咗一日後，尋日股價表現兩極，前者急升7.3%，至23.4元，後者則跌4.6%至2.49元。

睇番現代牧業一○年上市價2.89元，上周五就因傳出售資產而創出2.9元的歷史新高，依家蒙牛以每股2.4518元向兩家私募基金收購12.96億股，折讓一成半，消息有利蒙牛，後市值得睇好。

蒙牛今次落實交易，旨在透過加強合作，保證長期同穩定的優質原奶供應。瑞信同德銀齊齊出報告，分別畀佢目標價25.7元同23.2元，雖然瑞信下調盈測同目標價，不過認為收購代價低過預期，公司長遠仍會增加上游投資，以改善產品質量同提高淨利潤率，睇好佢可以跑贏大市，而德銀就話此舉有助減低對手收購現代牧業的風險，可以繼續持有。睇番幅圖，股價尋日一口氣收復多條平均線，技術走勢轉好，如果短線成功升穿五十二周高位24.3元，後市話唔定會見26蚊。