政壇：徽商行長 來港撲奶粉
香港奶粉受歡迎，即使有限奶令，依然有唔少內地訪客為子女撲奶粉。徽商銀行行長吳學民就趁嚟香港出席業績會之機，順便撲埋一份，不過，由於記者會更緊要，所以佢要趁記者會結束後嘅時間，先走去行吓街買奶粉。
吳學民嘅第三個孩子就快出世，嚟香港開業績會都要幫手撲奶粉。
吳行長之所以咁緊張，原來係佢第三個B就嚟出世，但佢今日就飛走，惟有喺飛之前拿拿聲抓緊時間去藥房掃奶粉，為此仲要問吓地膽邊到有藥房添，不過，限奶令下每個人只可以帶兩罐奶粉離境，佢打算買幾多呢？呢個廿四孝爸爸就笑笑口話，佢可以叫埋其他同事幫手拎。
徽商另有管理層就話，之前整親隻手，試過用香港一隻活絡油，捽一捽第二日就即刻無事，所以唔少親戚朋友都專登託佢今次買番幾支看門口，講到香港啲藥油好似神藥咁，咁佢哋一行真係要去藥房入貨喇。
