政壇：建仔名單洗牌 劉國勳選立會
立法會九月換屆，各黨派已陸續定出「出戰」名單。北區區議員劉國勳確認，佢已經喺其所屬嘅民建聯（建仔）以過半數票數勝出立法會功能界別區議會（一）界別嘅遴選，料將於九月代表建仔出選，取代現任議員葉國謙。而早前辭任行政會議成員一職嘅建仔立法會議員李慧琼（Starry）將會於俗稱「超級議席」嘅區議會（二）界別角逐連任，而該黨於上月立法會新界東補選落敗嘅離島區議員周浩鼎（Holden）亦會代表民記出選超級議席。
劉國勳
劉國勳尋晚透露，佢以過半數票勝出建仔黨內遴選，一百一十七名建仔區議員全部都有投票，但具體得票數字就唔公布喇。而尋日只係佢哋黨內遴選委員會向中委備悉工作進展，當中包括確認Starry同Holden會代表建仔出戰超級議席。
劉國勳又話，雖然已勝出黨內遴選，未來仲要拜會各黨派，爭取佢哋支持自己出戰立法會區議會（一）界別，強調仍然同建仔中西區區議員陳學鋒、深水埗區議員鄭泳舜、觀塘區議員洪錦鉉，三位同樣有參加黨內立法會區議會（一）界別遴選的黨友「一條心」，未來亦都會互相支持對方工作。
