立法會九月先舉行換屆選舉，但依家已經戰雲密布，立會一人黨民協早已計劃今年再接再厲，力爭上屆失落嘅九龍西直選議席，不過，由邊個上陣一直傳聞多多。據聞，最初原定由上屆落敗嘅譚國僑再戰，未料黨內已有新老交替之聲，作為老將嘅譚國僑行情被看低咗，但佢另出新招，表示會喺未來主打「二次殖民」概念，希望吸納黨內支持，喺各區參選名單中出線喎。
「二次殖民」係乜？據譚國僑話，佢由中英前途談判經歷至回歸後，原以為港人可以當家作主，但至今中央承諾嘅「一國兩制」、「高度自治」均無晒影，特區政府又難以溝通，民協一直追求嘅「又傾又砌」根本無從入手。佢形容呢個現象就係「二次殖民」，佢會向黨友推銷呢套論述，希望喺六月民協嘅三十周年籌款晚宴時有所着墨。
恐兩頭唔到岸
照咁講，譚國僑嘅意思即係香港回歸以來嘅情況走晒樣，一國兩制似是而非，香港嘅情況同回歸前冇乜唔同，都係被殖民，所以譏之為「二次殖民」。或者譚國僑以為呢個論述好有創意、好激，兼好有市場，但佢有冇諗過呢個講法根本不合政治倫理，而一國兩制走樣之說咪又係老調重彈、執大黨口水，點睇呢個說法都唔討好，難為佢視為翻身之作。
佢咁搏命，都係想同被視為中生代嘅新任主席莫嘉嫻砌過，爭取黨內支持，但「新老交替」係政圈大勢所趨，即使為咗個黨嘅可持續發展，都應該落力培養新秀或中生代啦，扮激或以激進路線出位，對民協呢個一向被視為較理性嘅黨嚟講，恐怕只會顛覆個黨，分分鐘失去原有支持、又唔夠人激，爭唔到新嘅支持，咁就兩頭唔到岸嘞。
第一手消息請下載on.cc東網
