趙振國（左）話支持余鵬春（右）參選批發零售界議席。
早前一個鐘錶界人士雲集嘅活動上，盛傳有意角逐立法會批發零售界議席嘅「假髮大王」趙振國同裕華國貨董事總經理余鵬春（PC）不約而同現身。距離九月立法會選舉唔夠半年，睇嚟兩人都好勤力為呢場選戰熱身。
政壇流傳PC可能喺批發零售界同香港總商會立法會代表兩個功能界別二揀一，但早前總商會主席彭耀佳表態支持現任立法會代表林健鋒連任，唔知係咪因此令PC嘅計劃有變，於是專心挑戰批發零售界呢？不過，PC對此笑而不答。
講開又講，聽聞趙振國一心同批發零售界現任議員方剛對決，但自知勝算不大，所以若被睇高一線嘅PC出戰，趙振國就唔會參選，改為全力支持PC。難得見到兩人同場，我哋趁機問吓趙振國會唔會支持PC選批發零售界啦，佢好爽快話支持喎！
第一手消息請下載on.cc東網
