政壇：南旋上市編號 做到十全十美
做生意好講意頭，新股南旋控股尋日上市，講起佢哋嘅上市編號1982，主席兼行政總裁王庭聰同現任非執董嘅細佬王庭交都好滿意，王庭聰仲笑笑口咁話，呢粒數有十全十美嘅意思，因為1+9同2+8都等於10。
睇真啲，王庭聰（右二）同王惠榮（右一）笑起上嚟幾似樣。
呢個數之所以咁特別，係因為1982年係佢哋間公司嘅前身恒昌織造廠創立之年，王庭聰話，嗰陣係第一次創業，過程好唔容易。南旋係家族生意，大佬王庭聰坐正自然唔使講，三個細佬都分晒工。創辦人之一王庭交依家係非執董；王庭真做緊首席生產總監兼執董，主要睇住內地同越南兩邊工廠嘅生產管理；王惠榮就係首席營運總監兼執董，睇晒成個集團嘅營運、研發同銷售策略。
既然係家族生意，咁第二代呢？尋日王庭聰嘅公子王槐裕都有現身，佢同樣喺公司做緊非執董，不過佢就好低調，話自己只係畀啲投資意見，無實際進入公司營運咁話喎。
