政壇：何民傑德國公幹 甘做水客
107動力召集人、西貢區議員何民傑（Raymond）早前添丁，但佢年初幫街坊搞維園年宵一日遊，順道邀請街坊出席佢囝囝「閃閃仔」嘅百日聯歡會，令網民誤以為佢用公帑幫囝囝搞百日宴，搞出個大頭佛，好彩只係一場美麗誤會。閃閃仔轉眼已經五個幾月大，廿四孝爸爸Raymond最近不惜遠赴德國柏林，學人做水貨客喪買有機奶粉，空運三箱返港畀囝囝飲，相信夠佢飲到一歲喇。
何民傑
何民傑遠赴柏林開會，仲做埋水貨客幫囝囝大舉入貨。
（受訪者提供）
Raymond日前以香港地區會員身份遠赴柏林出席世界納稅人協會大會，但Raymond此行另一目的，就係行勻柏林地鐵沿線嘅有機超市幫囝囝入貨。Raymond話，閃閃仔飲開一隻德國牌子嘅有機奶粉，佢發現喺當地買平過香港一百元，決定大手入貨，笑言超市職員見佢入咁多奶粉，都好奇問佢究竟有幾多個小朋友，好彩冇對佢實施限奶令咋。Raymond寓公幹於做水貨客，果然貫徹佢唔會浪費「公帑」嘅原則，嚴格監控政府同屋企嘅開支。
